Gauez etxeko logeletan azaltzen den jeinu maltzurra dugu Inguma. Eztarrian korapilatzen zaio lo dagoenari arnasa etenaz, itolarri jasangaitza sorraraziz.
Amesgaiztoen, lo ezintasunen, haur negartien eta senda ezinezko gaitzen errua Inguma jeinuari egozten zaio.
Baserri askotako ustea da, Inguma hildako arbaso baten espiritu urduria dela, sendiarekin haserreturik, heriotzaren azken arnasa bakean hartu ez duena.
Ingumaren agerraldiak ekiditeko, Gauargi jeinu ongileari egiten diote otoitz. Bestalde, kristautasunarekin batera, besteak beste, Ines, Prudentzio, Andres edo Pedro deunei errezatzen zaie Inguma etxetik urrun izateko. Halaber, Ezpeletan eta Saran oheratu aurretik honako hitzak esaten dituzte, Ingumaren beldurrik gabe lo goxoetan erortzeko:
"Inguma enauk hire izu
Jainkoa ta Andre Maria
zeruan izar, lurrean belar, kostan hare
haiek denak zenbatu arte
etzadiela niganat ager."
No hay comentarios:
Publicar un comentario